Mandal og Lister pyntegrøntlag er først og fremst eit produsentlag med føremål å yte sakkunnig hjelp og rettleiing til nåverande og framtidige produsentar av pyntegrønt, inklusive omsetjing av produkta.

Interesseområda er spreidd frå dyrking av juletre i høgareliggjande innland til produksjon av kristtorn og andre varmekjære planter i sørlandsk kystmiljø. Laget driv også med produktutvikling for å finne nye omsetnings- og bruksformer for pyntegrønt, samstundes som ein prøver å forbetra det plantematerialet som finst.

Produksjonen går føre seg i kjerneområdet for dyrking av pyntegrønt. Saman med nitid kontroll i alle ledda klarer laget difor å  halde høg kvalitet på varene. 

Namnet på laget er litt nostalgi men viser samstundes kva region laget dekker. Dei vestre og sørlege delane av nåverande Vest-Agder fylke var tidlegare delt i Lister Amt og Mandals Amt som seinare blei slått saman til Lister og Mandal Amt og endå seinare blei ein del av Vest-Agder fylke.
Symbolet øvst på sida var logo for Lister pyntegrøntlag. Håper det er OK å bruke det.