|
Hovudsida
Tips om bruk
Hjelp på norsk
Installer hjelp
Bytte språk i GIMP
Om omsetjinga
Ordvala i GIMP
Tastesnarvegane
|
Installere hjelp
Sjå nedanfor korleis du kan få hjelp for GIMP versjon 2.6
GIMP har eit nokså godt utbygd hjelpsystem som mellom anna kan nåast ved å trykke på F1 eller frå hovudmenyen. Når du laster ned GIMP følgjer ikkje hjelpfilene med automatisk. Difor må du hente og installere desse sjølv. Du kan anten gå til http://www.gimp.org og klikke deg fram til filene, eller du kan gå direkte til t.d. ftp://ftp.gimp.org/pub/gimp/help/ eller http://docs.gimp.org/no/.
Frå versjon 2.6 kan du også få hjelp direkte frå Internett dersom hjelp ikkje er installert i maskinen du bruker. Dette går automatisk.
For versjonar av GIMP før 2.6:Det enklaste er å laste ned sidene til ein førebels lagerplass i maskinen din. Bruk filhandteraren og klikk deg deretter fram til du finn noe som liknar på det som er vist på bildet til høgre. Som oftast finn du GIMP i katalogen C:/programfiler. Dersom mappa help manglar, må du lage denne. Du må også ha ei av mappene nb eller nn. Kopier deretter alle hjelpfilene, dei fleste med med «etternamnet» .html, inn i t.d. nn. For å vere på den sikre sida, kan du deretter kopiere mappa og gi kopien namnet nb. Dermed skulle du få opp hjelp same kva variant av norsk maskinen er sett til. Hugs også å kopiera over bileta til mappa images. Når du opnar GIMP skal hjelp nå vere på plass. Nedlastingane kan gjerast på fleire måtar og med ulike resultat. Difor er dette ikkje nærare omtalt her. (I og med at eg skriv filene sjølv, har eg aldri lasta dei ned. Originalane får eg heim via helt andre nedlastingsformer). Det viktige er å få nb/no med hjelpfilene og biletfilene (images). Dette verkar i alle fall fint i min maskin, men i IKT-verda bør ein vere forsiktig med å love meir enn ein er sikker på å kunne halde.
Frå versjon 2.6 og utover:Bildefilene ligg nå i språkmappa. Elles er prosedyren den same som ovanfor. Måten å kode hjelpfilene på blei forandra frå versjon GIMP 2.6. Dette har ført til problem med å generere html-filene, dvs. dei filene du lastar ned som hjelp. Til vi får dei ulike konverteringsprogramma til å virke, kan du førebels laste ned hjelp for GIMP 2.6 som ei zip-fil. (Ca. 29 Mb) eller i html-format som kan lesast i vanleg nettlesar. Handboka blir stadig forandra/forbetra. Denne versjonen blir ikkje oppdatert kvar dag, men nokså ofte. Sjå nedst på sida. Det finst også ein PDF-versjon, men den er ikkje oppdatert verken på engelsk eller andre språk på ei god stund. |
|
Dagens tips på norsk
Det er rapportert problem med å få fram dagens tips på norsk, i alle fall på Windowsmaskiner. Eg har ikkje kontrollert dette for alle maskiner, men i min Windows XP var problemet at GIMP reknar med å finne språket no i tipsfila, men sidan denne ikkje fanst, blei dagens tip på engelsk. Løysinga var å lage to utgåver av tipsfila, ei med bokmål i no-taggane og ei med nynorsk i dei same taggane.
Nå skulle dagens tips vere på plass på norsk. Fila gimp-tips.xml inneheld også dei andre språka som GIMP er omsett til. Fila bruker skriftformatet UTF-8, eit format som Windows har problem med. Lagring frå Windows vil som oftast øydelegge dette formatet, og fila vil ikkje bli funnen av GIMP. Du må difor ha tilgang til program som kan lagra i UTF-8 dersom du har planar om å gjere endringar i fila. Sjølvsagt kan du sjå på fila utan å lagra, men det er ein risiko. Lag i det minste ein kopi først.
|
 |
Historia bak hjelp på norsk
Det fanst ikkje hjelp på norsk til GIMP. Eingong på hausten 2004 begynte eg difor på ei omsetting av hjelp for GIMP 2.2 i html-format. Nokså uvaska og med mange feil, både språklege og i høve til funksjonane i GIMP. Eg rekna med å vere ferdig i løpet av vinteren. Utpå sommaren 2005 blei heile strukturen i den originale utgåva av Hjelp for GIMP bygd om. Det meste måtte difor skrivast om. Eg valde då å skrive den nye versjonen i xml-kode i DocBook-format, som er slik dei offisielle hjelpfilene for GIMP blir skrivne, og melde meg samstundes inn i dokumentasjonsteamet. Ved hjelp av gode medhjelparar der, kom dette arbeidet i gang våren 2006. Omsettingsarbeidet var likevel mykje meir tidkrevjande enn eg hadde drøymd om på førehand. Det var ikkje nok å skrive teksten om på norsk, men arbeidet måtte kodast og verifiserast og godkjennast før den endelege versjonen blir lagt ut på GIMP sine hjelpsider. Dermed heldt ikkje planen om å ha det meste unnagjort innan utgangen av 2006. Fekk heller satse på å ha det meste ferdig i løpet av 2007. Men så kom versjon 2.4 av GIMP i oktober, og dermed måtte mykje skrivast om igjen. Hausten 2008 blei heile systemet for omsettinga lagt om igjen. Dermed var det til å lære seg alt frå botnen igjen. Diverre førte omlegginga til at fullversjonen av Hjelp for GIMP 2.6 førebels bare er tilgjengeleg for dokumentasjonsteamet. Ikkje noe god løysing! Den vanlege brukaren må greie seg med hjelpa som blei skriven for GIMP 2.4. eller ein delvis omsett 2.6 versjon. Sjå likevel nedanfor.
Nyaste versjon av Hjelp på norsk
Planen er at du alltid skal kunna henta heim den nyaste versjonen av handboka på norsk ved å gå inn på dokumentasjonssidene for GIMP på http://docs.gimp.org/no/ (vil truleg bli endra til http://docs.gimp.org/nn/ ved neste revisjon) eller ftp://ftp.gimp.org/pub/gimp/help/. Dette fungerer ikkje for Hjelp for GIMP 2.6 førebels. Dokumenta som ligg der er laga ved at det som var omsett for versjon 2.4 og passar for versjon 2.6 er omsett, resten er på engelsk. Dette gjeld alle språk hjelp er skrive på. Medan du ventar, kan du laste ned fullstendig hjelp for GIMP 2.6 frå nedst på denne sida. Desse hjelpfilene er nå nokså nær slik dei blir når denne versjonen av hjelp blir frigitt.
Skulle du slumpe til å bruke html-filene samstundes med at dei blir oppdaterte kan det hende du får feilmeldingar om at bildet ikkje finst el.l. Bare prøv ein gong til om ei lita stund.
Merknader?
Det har vore eit nokså omfattande arbeid å finne passande norske fagtermar for ein del av funksjonane i GIMP. Mange av desse er nye, eller har fått nye bruksområde, i høve til vanleg språkbruk. Dessutan er det slett ikkje alltid at dei engelske orda er fulldekkande. Sjå meir om dette på sida om fagtermar. Omsetjinga til nynorsk for GIMP og hjelpfilene følgjer nokså nær tilrådingane frå Linux-omsetjarane.
Sjølvsagt er eg svært interessert i tilbakemeldingar dersom du finn feil, har ønskje om endringar osv. Det er bare å kontakte meg på adressa nedst på sida.
Ferdig
Hjelpfilene for GIMP 2.6 er nå ferdig utvikla og omsette så langt ein kan seie at eit slikt arbeid er ferdig. Den finpussinga som er igjen vil vere lite merkande for den vanlege brukaren. Dei hjelpfilene du finn under til høgre er såleis nokså nøye dei som vil bli lagt ut som den offisielle handboka for GIMP. Når det skjer veit eg faktisk ikkje.
|
|
||||||||||||||||
