Val av program

Har du til tider drøymt om eit skikkeleg bildebehandlingsprogram?
Ønskjer du deg eit program som kan gjere meir enn den «gratis» programvaren du får når du kjøper fotoutstyr?
Er du såpass avansert at du har begynt å spare til PhotoShop eller eit anna profesjonelt program?

Svarer du ja på desse spørsmåla, er du tydelegvis ikkje klar over bildebehandlingsprogrammet GIMP. Med GIMP kan du gjere det aller meste du måtte ha bruk for av bilderedigering. I tillegg mange ting du aldri har tenkt på. Prisen er det heller ikkje avskrekkande. GIMP er ein del av den veksande gruppa gratisprogram med open kjeldekode som kan brukast gratis av alle. Det kostar bare litt tid til nedlasting frå http://www.gimp.org eller andre stader du måtte finna det.

GIMP kan brukast til det aller meste innan bildebehandling. Programmet er best på rein bildemanipulering, godt brukbart for å lage eigne bilde, minst eigna til vektorgrafikk. Sjå innhaldslista i Hjelp-filene. (Link nedst på sida).

GIMP finst på svært mange språk, også bokmål og nynorsk.

Hjelp for GIMP finst førebels nokså komplett på norsk, engelsk, fransk, italiensk, spansk og tysk. Dessutan er større eller mindre delar omsett til andre språk, derimellom svensk.

Å installere og bruke GIMP er like lett som tilsvarande prosessar for andre program du måtte ha i maskinen din. At GIMP har open kjeldekode betyr bare at dei med spesiell interesse for programmering kan gå inn og forbetra programmet. Folk flest bruker programmet utan å tenke særleg på korleis det verkar eller er bygd opp.

Hjelp på norsk

Du finn den nyaste utgåva av hjelp på norsk som html-filer på http://docs.gimp.org/no/. Ei utgåve i pdf-format er under arbeid, men er førebels nokså uferdig. Fagtermane på nynorsk følgjer nokså nøye tilrådingane frå omsetjargruppa for Linux, og er ikkje alltid heilt like dei som er brukte på bokmål. Arbeidet med samordninga er i gang, men ting tar som kjent tid, i alle fall når framdrifta er avhengig av kor mykje fritid dei involverte kan bruke på dette. Du finn meir om dette på (den litt forelda) sida om fagtermar.

Å installere hjelp

Last ned den norske html-versjonen frå http://docs.gimp.org/no/ til mappa Gimp share gimp 2.0 help. (Dersom mappa «help» manglar, må du lage denne). I GIMP opp til og med verson 2.4 må du i tillegg syte for å få med bildefilene. Du finn ei meir detaljert oppskrift på Innstallere hjelp.

Framdrift

Hjelp for GIMP versjon 2.4 er ferdig omsett og vil ikkje bli arbeidd vidare på.

Hjelp for GIMP 2.6 blir oppdatert nesten dagleg, men diverre bare intern i dokumentasjonsteamet.Vi måtte bytte program for å skrive hjelpfilene. Filene blei rett og slett for store for det gamle systemet. Førebels har vi ikkje greidd å samordne det nye systemet med det gamle for å få laga dei html-filene som du kan laste ned som «Hjelp for GIMP». Programmerarane arbeider med saka og vonleg får vi orden på dette i løpet av hausten 2009. Inntil dess har eg lagt ut dei norske html-filene separat. Dei einaste komplette og oppdaterte filene for Hjelp for GIMP tilgjengelege for alle er såleis dei norske. Sjå nedst på sida.

Ulemper?

Sjølv om versjon 2.6 av GIMP er forbetra i så måte, er likevel inngangsterskelen noe høg. Dette betyr at du må arbeide litt for å få tak i korleis du best kan gjere deg nytte av programmet. (GIMP er likevel svært enkel i bruk samanlikna med t.d. PhotoShop, om det kan trøyste noen). Bruker du ei lita kveldsstund på å leike litt rundt med eigne foto i GIMP, vil du truleg kunne ende opp med nokså avanserte bilde innan kvelden er slutt. Sjølvsagt vil eg tilrå at du bruker Hjelp ikkje bare når alt anna sviktar. Handboka er utruleg informativ.

GIMP er under stendig utvikling. Sidan programmet er gratis, er det ingen grunn til å arbeide med anna enn siste versjon.

Tilbakemeldingar

Sjølvsagt er eg interessert i tilbakemeldingar frå brukarane, særleg om du finn store eller små feil i språkbruken. Der terminologien på nynorsk skil seg ut frå den på bokmål, har eg vore i kontakt med diverse faginstitusjonar og språkfolk, og sjølv om eg har vore nokså flink til å følgje råda, har eg gjort mange av vala etter eige skjønn. Likevel kan andre ha heilt andre meiningar om ordvala mine. Eg er ikkje språkfilolog, men ein nokså praktisk orientert realist med interesse for godt verktøy i alle situasjonar, også når det gjeld språk.

	Gå til norsk hjelp for GIMP 2.4
	Gå til heimesidene for GIMP
	Norsk forum for GIMP Prøv gimp.no

	Hjelp for GIMP 2.6 og høgare Medan vi ventar på den offisielle nedlastina
	Hjelp på norsk for GIMP 2.6

Helsing
Kolbjørn